Representantes das setenta entidades integradas no Foro Galego de
Inmigración mostraron onte na Coruña o seu rexeitamento ao «acoso» que
veñen sufrindo nos últimos meses comunidades xitanas da Coruña, Lugo e
Pontevedra. Coincidindo coa celebración da terceira asemblea sobre
inmigración e emigración de retorno, o foro solidarizouse coas familias
afectadas polo que cualificaron de «actitudes claras de racismo, puro e
duro», en palabras do presidente do colectivo, Miguel Fernández.
Durante toda a mañá, representantes das 70 entidades acordaron elevar
diferentes propostas ás Administracións para corrixir as desigualdades.
Antes da celebración de distintas actuacións multiculturais e o
desenvolvemento dun xantar, o Foro Galego de Inmigración deu lectura a
un manifesto para alertar de que, «coa escusa de combater a inmigración
clandestina, os Gobernos están a adoptar políticas represivas», sosteñen.
Sem comentários:
Enviar um comentário